2Cor 11 | DOB | STEP | 'Igu ona gete 'atuwa uwauwagu yaonaona, ta esi 'eguma wae'alama'i'itanedi, 'igu nuwanuwa yada simana apwesa 'emiya.

2 Corinthians 11

Paulo 'ina guinuwa

1 'Igu ona gete 'atuwa uwauwagu yaonaona, ta esi 'eguma wae'alama'i'itanedi, 'igu nuwanuwa yada simana apwesa 'emiya.

2 Manuna 'omi nuwanuwagu, nadigega Yaubada nuwanuwana 'abo'ada, 'enega ni'atu yasawa eyaiyemi Keliso 'enaya, be 'omi 'atuwa gomagweine 'ebweu nadigega 'ina bubuna bobo'ana maibo'ana tai ma'iyana sida ai. 3 Ta esi ya'atesa'ala manumi 'abona nai 'imi nuwanuwa sikwakwani be 'imi 'atetagwala Keliso 'ena wapilisine, nadigega lowa mwata Ibe 'ikaboena 'ina ona dibidibi 'enega, ga Ibe nina 'ineneta.

4 'Enega 'abo yaita 'iweewai be Yesu tetelina 'emiya 'iloguguya, ta nigeya 'abo'ama 'ima loguguya nadigega, tauna 'enaya watagwalemi tuga. 'Omi ni'atu tetela bobo'ana 'ena watagwalemi ga Yaluyaluwa Tabuna 'emiya walotoona, ta sa'i mali tetela be mali yaluyaluwa 'ediya watagwatagwalemi.

5 'Imi tologuguyao auwaudi 'omi wanuwena 'aene siloetana sinegu, ta esi nigeya sawesawediya. 6 Ona'ai'aila, nigeya yada ona bobo'ana, ta esi ni'atu wamwalatonigu 'aene tuta yauna yamwalamwalatoni 'ai'aila.

7 Lowa Yaubada tetelina 'emiya yaloguguyaena, ta nigeya 'ebweu maisa manuna yaonaona 'emiya, 'enega wanuwena nai yaloegesi manuna 'abo'agu yagimwa'utegu be 'aene 'omi wada miyatu'e. 8 'Ana 'ita 'atuwa ya'ipwa'ipwala mali ekalesiyao 'ediyega, manuna mani si'ebwa'eguya be 'aene 'omi manumi yada guinuwa.

9 Wate tuta nina 'imi senaya yamiyami ta yabotabotana, nigeya yada sida 'emiya, ta esi 'aina tasidao Masidonia 'enega simai ga lema si'ebwa'egu; manuna geya nuwagu be mwau 'emiya yasa'usa'u 'agu masula manuna. Lowa nigeya 'ebweu mwau 'emiya yasa'usa'u, be tuta simeemai 'ediya wate geya'abo yasa'usa'u. 10 'Igu onalaga gete ona 'ai'aila Keliso 'enega, be geya'abo 'ebweu yaita 'igu ona gete 'i'eto'etobode Akaya senanao maibo'adi 'ediya.

11 Ta to'ase 'alena? Nai 'igu ona gete manuna ga yaguitoyasemi? Nigeya sa'i! Yaubada 'imwalatoi 'ai'ailigu yaobobomemi.

12 Wate 'igu guinuwa manumi ma'etamo tuga yada guiguinuwa, be 'enega yada gielosa'udi taudi toona gagasa sigwae 'aene 'idi guinuwa 'emiya nadigega 'abo'agu 'igu guinuwa. 13 Manuna tokabo nidi 'adi 'ita 'atuwa Keliso 'ana tosimanao ta esi to'umalina siguiguinuwe. 14 Manuna gete Seitani adelina toto'umalina 'ina 'eda, be 'ana 'ita 'isa'ugelasa nadigega anilose maemaedanina. 15 'Enega geya'abo nuwami 'iowaowana 'eguma Seitani 'ina 'ali'eiyao wate 'adi 'ita sisa'ugelasa be toguinuwa palupaludi nadigega. Ta sa'i tuta 'ebe losalowa 'enaya 'idi bubuna to'umalina manudi taudi sida to'umali 'ai'aila.

Paulo 'ina 'elouyao

16 Yada eonami wate geya'abo wa'awa'awa uwauwaegu, ta 'eguma wa'awa uwauwaegu tuga, bobo'ana, ta esi 'igu ona uwauwa wada nono be 'enega tupwana yada onagagasa.

17 'Igu onagagasa gete nigeya 'Inapwana 'ina loinega, ta esi uwauwagu tuga. 18 Manuna tomota yaudi sionaona gagasa yage bale'u manudi, 'enega 'abo'agu wate yada onagagasa taudi nadigega.

19 Ta 'omi sa'i sinasinapumi ga tomota uwauwadi 'ediya wa'atetagwala, 20 'eguma paisewa mwaudi si'ebwa'emi, ta 'emiyega si'ipwa'ipwala, ta sikaboemi, be ma idi nuwatu'e maninimiya sisasapi. 21 Ta 'abo'agu nenetagu 'enega nigeya yada sapimi, ta gete 'ebe omayamaya 'eguya.

Ta 'abo 'imi tologuguyao nidi to'ase manudi sida onaonagagasa, tuwa tuga 'abo'agu yada etoeuwauwa, be sa'i yada onagagasa yage nidi wate manudi.

22 'Abo taudi me Ibeliu, 'abo'agu nadigega.

'Abo taudi Isileli 'ina susuyao, 'abo'agu nadigega.

'Abo taudi Ebelaamo tubunao, 'abo'agu nadigega.

23 'Abo taudi Keliso 'ina 'ali'eiyao bobo'adi, 'abo'agu 'ina 'ali'ei bobo'ana wawasae.

'Igu ona gete 'atuwa uwauwagu. 'Igu gwaunuwa 'enega yanugana sinedi, 'igu lugu deliya yau wawasae, 'agu sapiyao wate yauna, ga tuta yauna 'ediyega 'aene tuga 'iabe yada mwawasa.

24 Me Yudia balaeyega sisapigu, 'ana yau teti naini, ga sapi nina gete nadigega ma nima yalobedi. 25 Matoi wate siunugu kaiwe 'ediyega, ma'ebweuna gulewega siunu dadanegu, matoi waga 'enega yadamana bwagabwagaya, ta 'asiyata 'ebweuna be boiboi 'ebweuna 'idoedoegu. 26 Ta wate 'igu 'adau 'ediyega 'ebe esilae yalobedi bwasi sinabwadi 'ediyega, be to'ipwalao 'ediyega, be 'igu bodao taudi me Yudia 'ediyega be taudi nigeya me Yudia 'ediyega ta 'asa sinabwadi 'ediya, be mitawa 'ediya ta wate bwagabwagaya, be wate tasidao kabokabodi 'ediyega, 27 'ima paisewa sinabwana ga miyamwau 'adi tuta 'ediya, boiboi nigeya yada 'eno, ta botana be tona'a yala, wate tuta yauna nigeya 'agu masulamo, ta nigeya 'igu anuwamo tuta gogai 'ediya. 28 Be wate 'asiyata 'ebweuna 'ebweuna 'ediya yanuwanuwa sinabwana toekalesiyao sena yauyaudi 'ediya manumi. 29 'Enega 'abo yaita 'ineneta, 'abo'agu wate 'atuwa yaneneta, ta 'eguma yaita 'ebe esetupe 'ena 'ibe'u, nate 'igu 'ebe nuwamwau.

30 Ta wa'ita, 'igu onagagasa 'igu nenetao namo manudi. 31 Yaubada tauna 'Inapwana Yesu tamana tada tupu atae, ta tauna 'imwalamwalatonigu 'aene 'igu emwasala gete ona'ai'aila. 32 Lowa, Kini Aletasi 'ina tutaya toloina 'ebweu 'asa Damasiko 'ena 'itoowaiwai be ma ina tolosaiyao sida giyaigu, 33 ta sa'i gosegwao silemegu ga 'ali 'ana 'awa etanega sigigegena, ga 'enega sipela mwa'utegu kodoega bale'uya, ga 'agu talauwalao nidi 'ediyega yadena.